今日係星期日，而我一個人攤左係二樓既沙發到。我合埋雙眼，準備瞓覺，忽然間聽到一段熟悉既聲音。我唔想起身，直至聲音慢慢咁消失…
琴晚，有好多人黎屋企食野，大多數都係遠房親戚。雖然我對佢地冇咩舊有印象，不過佢地表現得好熱情，仿佛曾經認識過大家。契爺又帶左平時過時過節會帶黎既糕點同麻辣雞腳，我同屋企人都食得好滋味，好耐都冇試過同屋企人冇咩煩惱咁一邊溝通一邊食野。
琴日9點多既時候，我同阿爸坐係屋企既小花園到食野。忽然間，我見到一隻翠綠既蝴蝶由屋企裡面飛到花園荷花池左邊既大樹到。我同阿爸講述事情，可惜佢只係話鄉郊地方多昆蟲鼠蟻，然後就繼續食野。我見蝴蝶飛到樹裡面之後就消失左，我望左棵樹好耐，不過佢都冇咩動靜。我突然得出一個道理:蝴蝶想黎見我，不過擔心會嚇親我，所以一直都冇露面。
前日，我去左中區警署。因為我四個星期唔見左銀包，裡面既身分證同回鄉證都唔見左。我好激動咁去問佢，點解咁耐先俾到我，搞到我三個星期前唔可以番內地，不過佢好似唔明白，然後就還番個銀包並且叫我離開。
三個星期前既禮拜四，內地既舅父打俾我阿媽，同佢講公公身體有事，要立即做手術。當時，我心諗，點解要係我銀包唔見左既時候先講。我記得天文台當日話聽日會掛八號風球，而每個人都希望可以打倒"李氏力場"，成功掛八號，然而只有我一個係唔想呢件事既發生……
番到黎今日，我從沙發到離開，走到露台，再次望住那棵大樹:我想知道蝴蝶仲係唔係樹到……
