2016 香港渣打馬拉松

星期日本來係休息輕鬆既一日，不過作為一個半馬(半程馬拉松)跑手既我，心情好緊張...

WHY??? 因為我之前既練習唔夠啦 ~ 每次跑三公里左右就冇氣啦 = = 雖然係咁，我都唔會臨陣退縮 !!! 你話我唔怕死也好，不自量力也好，我都會去努力完成 !!! 

~5:15~

琴晚我好早就入左房，準備訓教，不過緊張既心情令到我去到12點先訓着-.-然後今日好早就起左身，我個朋友竟然話佢冇訓過 lol 他真的在玩命!!!

離開屋企前影低作為跑手既證明 ! (其實我好緊張啦= =)

~6:45~

好快就約埋我個朋友一齊由北角去尖沙咀準備啦 ~~~

~7:15~

去到既時候，其實都估到會落雨。我仲係好似岩岩訓醒咁既樣- - 好彩雨衣，長袖長褲都準備好曬，就差起跑聲 !!! 我地見仲有大把時間，就去太空館對面做下熱身(因為冇咩人-v-)我個朋友經常去廁所，仲頻密過我，不過個廁所真係呢...又多人排隊，又臭!!! 臭到出面都聞到@@

 ~8:15~

好快我地就去到預備區準備開跑。我發現真係好多人，我地企係好前既位置，不過我個朋友同我講頭3-4公里都係行，因為太多人啦~(好似又好有道理...) 

~8:25~

終於到左最後五分鐘開跑啦~!!!現場個氣氛好熱鬧。雖然雨愈落愈大，不過D人既聲音都蓋過雨聲。我見好多人直接除左件雨衣(佢地唔怕凍咩= =?)電台亦都播得好大聲，不過最好笑係個口號，口號前面係咩我就唔太記得啦~我只係記得"啪啪~啪啪~啪"我同我個朋友一聽到都笑左，不過我地最後都跟住電台主播一齊高舉雙手，不斷"啪啪~啪啪~啪"

~8:32~

比賽開始左一陣，我見到我個朋友由我後面好快就跑到我前面，好彩我個陣仲跟到大隊既速度，然後我漸漸地見唔到我個朋友既身影，而雨勢冇減弱過......

~8:45~

我已經見唔到我個朋友係邊，我只係知我轉左個彎，然後一直跟住大隊既速度跑。我發現後面既人仲好多，另外因為落雨既關係，搞到我跑到好慢，隻鞋又入曬水= =

~9:00~

當時我記得我要上斜，應該去到連翔道啦。我見雨好似細左，就直接除左件雨衣，因為有雨水既關係，搞到件衫太重啦 ~ 當時我發現死啦...我已經冇氣啦= =點算好呢???又冇補給站，我個陣只係想完成到10公里就放棄好啦 ~ 唉...

~9:20~

總算到左青葵公路啦~~~我終於見到補給站，我拚命咁跑過去。跑到去...咩話 ! 竟然得水供應 !!! 算啦 !照要 ! 我再唔飲野就真係死俾你睇 !!! 不過諗深一層，D水其實同飲雨水有咩分別呢?咪又係冇味冇到!!!好彩我跑多陣發現...終於有寶礦力啦!!!(好滾動T^T)我直接拎左兩支，一支飲完throw左，另一支一邊跑一邊飲~~~

~9:50~

我終於轉左彎，去緊隧道既方向。我睇番未轉彎既方向，一開始仲發現有好多人係後面，心諗唔駛怕啦，一定有人包尾既，點知5分鐘都唔夠，就發現另一邊已經冇曬人，嚇到我即刻唔慢慢行，認真去跑。

~10:10~

個陣我應該係奧運站。我keep住時跑時停(冇計啦~又冇氣又腳痛= =)個到我發現有好多野食，又香蕉，又車厘茄。我拎左2.5條香蕉食(半條係因為佢真係俾得半條我= =)唔知點解，我拎住D野係手，會跑得快D同有氣，可能見仲有野食盛(大食鬼www)，等一陣可以慢慢食~可惜既係雨愈落愈大，我好後悔throw左件雨衣T-T

~10:20~

總算入到隧道啦 ~ 一入到去就聽到好多人既回音同歡呼聲，大概大家都好慶幸終於唔駛淋雨啦XD 係隧道裡面，大家不時傳來人浪聲，令到隧道變得好熱鬧 ~~~ 我就不斷咁數個距離 ~ 320...330...340...(還是500米才開始跑吧(懶懶的-v-))

~10:28~

好快我就出左隧道，我keep住見斜路就行-.-(-->後面D人教我的)一開始還滿呆，為啥不是銅鑼灣?然後我先發現我岩岩係跑行緊西隧(西區海底隧道) 我發現我平時坐A12番屋企個陣都冇咁多斜路架...點解無啦啦會多左咁多= =?算啦~唔理啦~總算係番左黎港島區~!!!

~10:40~

不知不覺我就到左香港會議展覽中心。我見附近多左好多人影相。我亦都係跑個陣拎左好多野飲同查左D白色野落隻腳到。(好似查完真係快左少少) 然後我見到前面竟然有人扮蜘蛛俠。我當時以佢為目標，跟住佢既步伐去跑，而雨勢總算細左...

~10:58~

呢一刻，我真係唔相信自己可以完成到半馬既賽事。我見到終點係前面，我個陣其實已經冇曬力，不過唔知點解我可以繼續跑到，我見到有兩個人合力咁扶起一個人一齊去終點，我個一刻真係好感動，終於到左沖線既一刻，我高舉雙手，然後完成今次既賽事 !

之後我跟隨大會既指示，去H20既位置拎番自己既行李包，然後再打俾我既朋友，並係xx傢俬個位置合照一幅

然後，我地一邊講番大家跑既經過，並係北角站分開~